தெய்வத்திருமகள் குழந்தை சாரா ஞாபகம் இருக்கா..? இப்போ பாலிவுட் ஹீரோயின்..!  

 தெய்வத்திருமகள் படத்தில் சீயான் விக்ரமின் மகளாக நடித்த சாரா அர்ஜுன் தற்போது பாலிவுட் படம் ஒன்றில் ஹீரோயினாக நடித்துக் கொண்டிருக்கிறார். துரந்தர் என பெயர் வைக்கப்பட்டிருக்கும் அந்த படத்தை நடிகை யாமி கௌதமின் காதல் கணவரான ஆதித்யா தார் இயக்கி வருகிறார்.

ரன்வீர் சிங் ஹீரோவாக நடித்து வரும் துரந்தர் படத்தின் டீஸர் வெளியாகி ரசிகர்களின் கவனத்தை ஈர்த்திருக்கிறது. அந்த டீஸரில் சாரா அர்ஜுனை பார்த்த தமிழ் சினிமா ரசிகர்கள் அதிர்ச்சி அடைந்துள்ளனர். அதற்கு காரணம் ரன்வீர் சிங், சாரா இடையேயான வயது வித்தியாசம் தான்.

ரன்வீர் சிங்கிற்கு 40 வயதாகிறது. கடந்த ஜூன் மாதம் 18ம் தேதி தான் தன் 20வது பிறந்தநாளை கொண்டாடினார் சாரா.அப்படி இருக்க தன்னை விட 20 வயது சிறு பெண்ணுடன் போய் ரன்வீர் சிங் ரொமான்ஸ் செய்வதா என ரசிகர்கள் கேள்வி எழுப்பியுள்ளனர்.ரன்வீர் சிங்கின் மகள் போன்று இருக்கிறார் சாரா. அப்படி இருக்க அவரை போய் 80ஸ் கிட்டான ரன்வீர் சிங்கிற்கு ஜோடியாக நடிக்க வைத்திருப்பதில் நியாயம் இல்லை. வயதான ஹீரோக்களுக்கு சிறுபிள்ளைகளை ஜோடியாக்குவதை நிறுத்த மாட்டார்களா என கேட்கிறார்கள் ரசிகர்கள்.

மேலும் சிலரோ இது என்ன பிரமாதம், ரன்வீர் சிங்கிற்கும், சாராவுக்கும் இடையே 20 வயது தான் வித்தியாசம் உள்ளது. ஆனால் சிகந்தர் படத்தில் நடித்த சல்மான் கானுக்கும், ரஷ்மிகா மந்தன்னாவுக்கும் இடையே 30 வயது வித்தியாசம் இருந்தது . அத்துடன் ஒப்பிடுகையில் ரன்வீர் சிங், சாரா அர்ஜுன் ஜோடி பரவாயில்லை என்கிறார்கள்.

பாலிவுட்டில் மட்டும் அல்ல பிற மொழி படங்களிலும் ஹீரோவை விட 20, 25 வயது சிறிய நடிகை ஜோடியாக நடிப்பது சாதாரண விஷயமாகும். இந்நிலையில் தான் தற்போது புதுப்பட அறிவிப்பு வந்தால் ஹீரோ, ஹீரோயின் இடையேயான வயது வித்தியாசம் பற்றி அதிகம் பேசத் துவங்கியிருக்கிறார்கள் சமூக வலைதளவாசிகள். அதனால் வயது வித்தியாசம் பெரிய விஷயமாக தெரிய ஆரம்பித்திருக்கிறது.

துரந்தர் பட டீஸரை பார்த்தால் சந்தீப் வாங்கா ரெட்டி இயக்கத்தில் ரன்பிர் கபூர் நடித்த அனிமல் படம் நினைவுக்கு வருவதாக பலரும் தெரிவித்துள்ளனர். இது ரன்வீர் சிங்கின் அனிமல் போன்று என பேச்சு கிளம்பியிருக்கிறது. அனிமல் படத்தை போன்றே துரந்தரிலும் வன்முறை அதிகமாக இருக்கிறது. ரன்வீர் சிங்கின் தோற்றம், அவர் நடந்து வரும் விதம், வன்முறை காட்சிகளை பார்க்கும்போது அனிமல் படத்தை தான் நினைவூட்டிகிறது என விமர்சனம் எழுந்திருக்கிறது.